Ulaon ni Apostel 8
Alai dihalomohon si Saulus do pamununasida di si Stepanus. Jala masa ma olat ni na sadari i pangaleleon bolon dompak huria na di huta Jerusalem, gabe marserak ma nasida saluhutna, so padohot angka apostel, tu luat Judea dohot Samaria.
Alai ditanom angka halak na daulat roha ma si Stepanus, jala na nia lelengna ditatangisi nasida ibana.
Alai dipaporsukporsuk si Saulus do nasida na sahuria i: Dibongoti angka jabu, disarat sian i baoa nang boruboru, laho pasahathon tu hurungan.
Madangadang do angka na marserak i huhut mamaritahon hata i.
Laos tuat ma anggo si Pilippus tu huta Samaria, dijamitahon ma tu nasida Kristus i.
Jadi dung dibege natorop i jamita ni si Pilippus jala diida angka tanda na pinatupana, saroha ma nasida marateatehonsa.
Ai ruar do angka tondi na hodar, marsoara na balga sian torop halak na sinonggopanna i; godang do nang na sarion dohot na lumpuon dipamalum.
Jadi mansai las ma roha ni nasida na sahuta i.
Alai adong do di huta i hian sada halak na margoar si Simon, parsibalik mata na mangaliluhon roha ni halak Samaria i, ai na sumurung do ibana didok.
Jadi saluhut halak, angka na metmet dohot na magodang, mangihuthon ibana, angka didok ma: On ma hagogoon ni Debata apala na balga!
Alai umbahen na dipaihutihut nasida ibana na sai leleng, ala lilu nasida dibahen hapandeanna i.
Alai gabe tardidi ma angka baoa nang boruboru, dung porsea nasida di na binaritahon ni si Pilippus na taringot tu harajaon ni Debata dohot Goar ni Jesus Kristus.
Dung i gabe porsea ma nang si Simon ondeng jala tardidi ma, laos dipaihutihut ma si Pilippus; jadi mansai longang ma rohana marnida tanda dohot hagogoon na balga, angka na masa i.
Alai dung dibege angka apostel na di Jerusalem, naung dijalo halak Samaria i hata ni Debata, disuru nasida ma si Petrus dohot si Johannes manopot nasida.
Tuat ma nasida, ditangiangkon ma angka dongan i, asa dijalo Tondi Parbadia.
Ai ndang dope songgop Tondi i manang tu ise nasida, asal tardidi do nasida tubagasan Goar ni Tuhan Jesus.
Jadi mangampehon tangan ma apostel i tu nasida, gabe dijalo ma Tondi Parbadia.
Alai dung diida si Simon angka apostel i mangalehon Tondi Parbadia marhite sian na mangampehon tangan, ro ma ibana mamboan hepeng tu nasida.
Didok ma: Lehon hamu ma huaso sisongon i nang tu ahu, asa manjalo Tondi Parbadia halak, ia huampehon tanganku tu ibana.
Alai didok si Petrus ma mandok ibana: Mago ma ho rap dohot perakmi; ai dirimpu ho, tartuhor silehonlehon ni Debata marhitehite hepeng!
Ndang parjambar manang partohap ho di hata on, ai ndang na bonar roham maradophon Debata.
Ipe pauba ma roham sian hajahatonmi; dung i pangido ma tu Tuhan i, anggiat tarsesa tahitahi ni roham!
Ai huida do roham di bagasan pogu na paet, niihotan ni hageduhon.
Alai ninna si Simon i ma mangalusi: Tangiangkon hamu ma ahu tu Tuhan i, asa unang songgop tu ahu na nidokmuna i.
Asa dung dihatindangkon jala dihatahon hata ni Tuhan i, mulak ma anggo nasida tu Jerusalem; laos dibaritahon dope barita na uli i di torop huta na di luat Samaria.
Alai dipanghulingi surusuruan ni Tuhan i ma si Pilippus: Hehe ma ho, laho ma dompak dangsina tu dalan na langlang i, na tuat sian Jerusalem tu huta Gasa!
Jadi hehe ma ibana laho tusi. Jala adong ma disi sada halak Etiopia, parpangkat na balga, siramoti saluhutna arta ni si Kandake, raja ni halak Etiopia; i ma naung ro sian Jerusalem, dung martangiang disi.
Jadi hundul ma ibana di huretana laho mulak, huhut manjahai surat ni panurirang Jesaya.
Alai ninna Tondi i ma mandok si Pilippus: Laho ma ho tusi, hombari ma hureta i!
Jadi marlojong ma si Pilippus tusi, gabe dibege ma ibana manjaha surat ni panurirang Jesaya; dung i ninna ma: Atehe, diantusi ho do na jinahami?
Alai ninna ma: Songon dia ma haantusan ahu i, anggo so adong na mamodai ahu? Laos disosoi ma si Pilippus manaek, asa hundul tu lambungna.
Alai anggo hata ni surat na jinahana i on do: "Ditogu do Ibana songon birubiru tu pamotongan jala songon birubiru na hohom di jolo ni panggustingi; songon i do nang Ibana, ndang tarbege soarana."
"Di hametmetonna i marujung uhum na tu Ibana. Ise ma manjujur sundutna i, ai tarhinsat do hosana sian tano on?"
Dung i ninna parpangkat i ma mangkuling i si Pilippus: Raja ho, ise do na nidok ni panurirang disi? Ibana sandiri do manang halak na leban?
Dung i mangkuling ma si Pilippus, dibaritahon ma Jesus tu Ibana, marbingkas sian hata ni surat ondeng.
Alai laho manulus dalan i, jumpang nasida ma aek, jadi ro ma parpangkat i: Ndi on ma aek! Adong dope ambatna, unang ahu tardidi?
Dung i didok si Pilippus ma: Anggo na porsea ho dohot nasa roham, jadi do i! Gabe ninna ma mangalusi: Ahu porsea. Anak ni Debata do Jesus Kristus!
Laos didokkon ma maradian hureta i; dung i mijur ma nasida, si Pilippus dohot parpangkat i tu aek i, dipandidihon ma ibana.
Alai di na nangkok i nasida sian aek i, diluahon Tondi ni Tuhan i ma si Pilippus, jadi ndang be diida parpangkat i ibana; marlas ni roha ma didatdati sidalananna i.
Alai anggo si Pilippus, di Asdod do ibana jumpang; dibolus ma angka huta i sude sahat ro di Kaesarea, huhut mamaritahon barita na uli i.